Z. Edmond Haxhinasto

Zv. Kryeministër dhe Ministër i Punëve të Jashtme të Republikës së Shqipërisë

Z. Edmond Haxhinasto ka lindur në Tiranë, më 16 nëntor 1966. Ai është diplomuar për Gjuhën Angleze në Universitetin e Tiranës, Fakulteti Histori – Filologji, Katedra e Anglishtes në vitin 1989. Arsimimi i tij pas-universitar përfshin një gradë Master në Administrim Biznesi nga Qendra Ndërkombëtare Ekzekutive në Brdo, Slloveni në vitin 1996. Në vitin 2000, përfundoi një Master për Politikën Publike nga Shkolla e Çështjeve Publike dhe Ndërkombëtare “ Woodrow Wilson”, Universiteti Princetown në New Jersey. Pas një angazhimi të shkurtër në arsim dhe organizatën kombëtare të rinisë, gjatë periudhës Shtator 1991 – Korrik 1992 shërbeu si Shef i Marrëdhënieve me Jashtë në Parlamentin e Republikës së Shqipërisë. Nga viti 1993 deri më1997 ka punuar në sektorin privat. Nga Gushti 1997 - Korrik 1999 ka punuar si Shef i Departamentit të Koordinimit panë Zyrës së Kryeministrit. Ka qenë gjithashtu Përfaqësues Qeveritar në Grupin e Menaxhimit të Emergjencës, i krijuar për menaxhimin e situatës së refugjatëve Kosovarë në Shqipëri. Në 1998, ka qenë Kryetar i Grupit Monitorues Anti-Korrupsion, i ngarkuar me zbatimin e planit të Qeverisë për luftën ndaj korrupsionit. Nga Korriku 2000 deri në Tetor 2001, ka shërbyer si Këshilltar Diplomatik pranë Kryeministrit. Gjatë periudhës Nëntor 2001 - Korrik 2002 ishte i Ngarkuar i Përhershëm me Punë në Ambasadën e Shqipërisë në Beograd. Gjatë periudhës Gusht 2002 – Shtator 2003 shërbeu si Shef Kabineti në Ministrinë e Punëve të Jashtme. Nga muaji Prill 2004 – Maj 2005 shërbeu si Këshilltar i Zotit Ilir Meta, në cilësinë e këtij të fundit si Anëtar i Komisionit Ndërkombëtar për Ballkanin. Në Shkurt 2004 është bashkëthemelues i Institutit për Paqe, Zhvillim dhe Integrim. Nga viti 2004 ka shërbyer si Sekretar për Marrëdhëniet Ndërkombëtare, Kryetar i Komitetit Drejtues dhe Zëvendëskryetar i Lëvizjes Socialiste për Integrim (LSI). Gjatë periudhës 2009 – Shtator 2010 shërbeu në detyrën e Zv. Ministrit të Transportit dhe Punëve Publike. Që prej 16 Shtatorit 2010 shërben si Ministër i Punëve të Jashtme të Republikës së Shqipërisë